நாங்கள் செய்த தவறென்ன

ஆசிரியர் பணியை ஏற்ற நாள் முதல்

பக்தியாய் அதனைச் செய்கின்றோம்

சிறியவரிடம் சீற்றம் காட்ட வேண்டாமென்று

இன்முகத்துடன் பாடம் கற்பித்தோம்

பள்ளிக்கு வாரா பிள்ளையின் வீட்டுக்கு

தொலைபேசியில் அழைப்புவிடுத்தால்

அடுத்த முனையில்

பொறுப்பில்லாத பதில் வரும்

மெல்லக்கற்கும் மாணவனை 

பின்னே இருக்க வைத்து பாடம் கற்பித்தேன்

நான்கு மணிக்கு வீட்டுக்கு அனுப்புங்க அன் கடையை பார்க்கணும் என்றார் அப்பா

பிள்ளைகள் பாடம் படிக்க வேண்டுமென்றும்

பாடத்தை முடிக்க வேண்டுமென்றும்

சிறப்பு வகுப்புகள் வைத்தால்

வருபவர் சிலர்

வாராதோர் பலர்

சிலரோ எங்கோ சுற்றி  

காலம் தாழ்த்தி வீட்டுக்குச்சென்று

தாமதத்திற்கு காரணம் ஆசிரியர் என்கின்றான்

உண்மை புரியா பெற்றோரும் ஆசிரியரை வசைபாடி தீர்க்கின்றார்

பிள்ளைகள் செய்யும் தவறுகளுக்கெல்லாம்

பெற்றோரும்  சமூகமும்

ஆசிரியரைத் திட்டித் தீர்க்கின்றார்

தவறு செய்யும் மாணவனை திருத்தம் செய்தால்

எங்களுக்கு கிடைக்கும் பரிசு கத்திக்குத்து

எழுதாத மாணவனை ஏசாதே

தவறு செய்யும் மாணவனை தண்டிக்காதே

மாணவனின் மனநிலை அறிந்து பாடம் எடுக்க வேண்டும்

எங்கள் மனநிலை யார் அறிவாரோ

நாங்கள் என்ன கல்லோ மண்ணோ

பேசமுடியா கற்சிலையோ

மானமும் அவமானமும் எங்களுக்கில்லையோ

நாங்கள் செய்த தவறென்ன

ஆசிரியர் பொறுப்பேற்றதா

நல்ல மாணாக்கர்களை உருவாக்க நினைத்ததா

சமூகத்தில் மாற்றம் செய்ய நினைத்ததா?

தி.பத்மாசினி